Эстоний гыч уна-влакым вучен шуктышна!
Вход на сайт
Марий мландыш Эстоний гыч уна-влак толыныт. Хааня волость гыч куштымаш, модыш да муро обществын еҥже-влак республикыште 12-17 августышто лийыт. Тыште программыштым ончалаш лиеш - http://mari-arslan.ru/mari/welcome. А тиде увер Общество дене палдара.
Эстон мландысе Хааня волость гыч куштымаш, модыш да муро общество шке пашажым 1988 ий декабрьыште тӱҥалын. Ончыч тудо «Хааня волостьысо тӱвыра пӧртын калык куштымаш обществыже» маналтын. Тачысе лӱмжым 1994 ийыште налын.
Хааня волость гыч куштымаш, модыш да муро общество некоммерческий организаций семын регистрироватлатын. Тушто хореографлан Ульви Тоомик, концертмейстерлан Энн Хейер тыршат, а вуйлата Сульвер Краам.
Обществын еҥже-влак арнялан ик гана, изарнян, Хааня тӱвыра пӧртыштӧ чумыргат. А тӱвыра пӧртшӧ Прибалтикын моткоч кӱшыл ужашыж пелен – Мунамяги курык воктене – верланен.
Тышке чумыргышо-влакын кокла ийготышт – 40 наре ий. Икшыве-влак гын йоча коллективыш коштыт.
Тиде общество Норвегийыште (1995 ий), Швецийыште (1991 да 1995), Нидерландыште (1996), Венгрийыште (1998, 2007), Италийыште (2011), Чехийыште (2012) шке мастарлыкшым ончыктен. Нуно Российыштат лийыныт – Мордва Республикыште да Псков областьыште. (2006). Чӱчкыдын Латвийышке ӱжыт, мутлан, тушто 1997 ийыште лийыныт. Эстонийымат тореш-кутынь кудалышт пытареныт. Кажне ийын гаяк Кубясе куштымаш фестивальыште да Вырусо фольклор фестивальыште выступатлат.
1998 ийыште Таллинныште эртыше Балтик фестивальыште тӱҥ сценыштак шкеныштым ончыктеныт. Тунам Обществын хореографше Ульви Тоомик шкешотан куштымаш программылан премий дене палемдалтын.
1999-2004 ийлаште республикысе куштымаш фестивальлашке коштыныт. 2000 ий Эстон-финн хореографий фестиваль дене шарнымашеш кодын. Куштызо-влак Раквере олаште пӧръеҥ куштымаш фестивальыште ойыртемалтыныт. 2006-2007 ийлаште Таллинныште пиве фестивальыште участвоватленыт.
Общество эстон калык куштымашым шаркала да национальный кас-влакым эртара. Тыгодым вес калыкынат тӱвыражым шымла. Нунын - шкеныштын вургемышт. Тыге ӱдырамаш ден пӧръеҥ сӧрастарымаш-влак кугезе йӱлам аралат.
Общество Выру оласе музыкант ден композитор-влак дене кылым куча. Ончыкшым пырля калык семӱзгар оркестрымат ышташ шонат.
