5-7 августышто Хельсинкиште (Финляндий) МАФУН-ын - Финн-угор самырыктукым ассоциацийын - XI конгрессше эртен. Тушко 37 делегат да 43 эскерыше ушненыт. Марий Эл гыч – Алёна Иванова, Евгений Сиваев, Наталья Венина («ВийАр» марий молодёжь общество), Андрей Эманов, Эдуард Оразаев («У вий» марий самырык ушем), Надежда Николаева («Югорно» мер организаций), Светлана Кушакова («Кугарня» газет), Василий Петров (МАФУН-ын экс-президентше, Кугурак-влакын ушемышкышт пурышо).

Икымше кечын МАФУН-ын президентше Василий Немечкин ассоциацийын кок ияш пашаж нерген докладым ыштен. Палемдыман: X Конгресс Саранскыште эртен да «Общественная дипломатия и международное сотрудничество» темылан пӧлеклалтын. А Немечкин шке выступленийыштыже МАФУН-ын ООН дене кылым чолган вияҥдымыж нерген ойлен. Мутлан, 2012 ий майыште ООН-ын штаб-пачерыштыже «Коренные народы Евразии» событий кышкарыште Ассоциаций мероприятийым эртарен.

Теве «Культурные столицы финно-угорского мира» программе пашам ышта. Тудын тӱҥ шонымашыже: тӱрлӧ элласе да тӱрлӧ регионысо изи ял ден посёлкылам социал-экономике да тӱвыра могырым вияҥдаш кумалыҥдымаш. Ныл ийлан палемдыме программын икымше идалыкшым МАФУН-ын Конгрессше годым 7 августышто иктешленыт (http://finugor.ru/node/41993). Конкурсышто 8 ял вийжым терген да сеҥышыш одо ял – Удмуртийысе Шарканский районын Старые Быги ялже – лектын.

Самырыктукым финн-угор мероприятийлаште чолган участвоватлат. Ик пример гына: Венгрийыште эртыше Финн-угор калык-влакын VI тӱнямбал конгрессыштышт 60 наре самырыкъеҥ лийын.

Ассоцийын пашаже ынде тудын сайтыштыже кумдан почылтеш - http://www.mafun.mol-rm.ru. Тыгак Ютубышто шке каналышт уло -http://www.youtube.com/user/TheMAFUN. Моло сайтлаштат нунын дене кылдалтше информацийым муаш лиеш, но Василий Немечкинын палемдымыж почеш, ты шотышто пашам утларак сайынрак да тӱткынрак вияҥдыман.

Ончыкшым МАФУН-ын пашаж шотышто «Корно картым» ышташ шонат.

Тыгак Конгресс кышкарыште Ассоциацийын ончыклыкшо нерген ӱчашен мутланеныт. А пытартыш пленар погынымаште у президентым сайленыт.

Тиддеч ончыч МАФУН-ым Мордовий гыч Василий Немечкин вуйлатен. Ынде финн самырыкъеҥым – Хельсинки университетын родо-тукым калык-влакын студент ушемыштын еҥже Сампса Холопайненым сайленыт. Тудо тиддеч ончыч МаФУН-ын тӱнямбал кыл шотышто вице-президентше лийын.

Вице-президентлан Лаур Лыхмусым (Эстноий), Ян Сажиным (Коми) да Василий Немечкиным (Мородовий) шогалтеныт.

Конгрессын пытартыш пленар погынымаштыжак МАФН-ын правлений членже-влакым ойыреныт. Тушко ончычсо семын 14 еҥ огыл, а 18-ше пурен. Ты чот Ассоцийыш ушнышо организаций-влаклан кӧра кушкын. Марий Эл гыч Правленийыш «ВийАр» марий молодёжь обществын еҥже Евгений Сиваев пурен.

А МАФУН-ыш у организаций-влак ушненыт: Финляндийысе Турку университетысе финн-угор йылме-влак пӧлкан «Sugre» студент организацийже; Эстоний гыч "Fenno-Ugria Noora", "NEFA" да сету молодёжь организацийла; Москосо «Неватас» ден «Парма» коми землячестве-влакын самырык «шулдырышт»; Мурманск кундем гыч «Самь нураш» саам молодёжь организаций»; «Марийцы Карелии» организацийын самырыктукым ужашыже да Нарьян-Мар гыч «Ясавэй» ненец калыкын ассоциацийышт.

МАФУН-ын Конгрессше нерген шуко информаций - http://finugor.ru