МарГУ-ШТО финн йылме да тÿвыра кеҥеж курс эрта

2016 ий 4 гыч 22-шо сÿрем тылзын CIMO Тÿнямбал мобильность рÿдерын (Хельсинки ола, Финляндий) полшымыж дене Марий кугыжаныш университетыште Финн йылме да тÿвыра кеҥеж курс эртаралтеш.

Ты рÿдер Российысе финн-угор университетлаште финн йылмым тунемше студент-влаклан кеҥеж курсым эртара. Тышке йÿла почеш Мордовий, Марий Эл, Коми, Удмуртий республикла, Пермь край да Хант-Манси АО гыч кумылан-влак толыт.

Родо-тукым калык-влаклан курс 1992-шо ий гыч эртаралтеш. Икымше гана тудо Финляндийын Турку олаштыже лийын. Тылеч ончыч Финн йылме да тÿвыра кеҥеж курсым Саранскыште (2013-шо ий), Ижевскыште (2014-ше ий) да Сыктывкарыште (2015-ше ий) виктарен колтеныт. Пытартыш гана мемнан университет 2012-шо ийыште курсын участникше-влакым вашлийын.

Тений курсышто финн йылмым тунемаш веле огыл, тыгак марий йылме да тÿвыра дене палыме лияш йӧн ышталтын. Программе почеш тунемше-влак кас мероприятийлаште (финн-угор модыш, муро, куштымаш, калык кочкыш) участвоватлаш тÿҥалыт, Морко да Курыкмарий районлашке, Йошкар-Ола да Козьмодемьянск ола-влакын тоштерлашкышт экскурсий дене лектын коштыт.

Автор: Финн-угор да таҥастарыме филологий кафедр.
Налме вер: https://www.marsu.ru.