"Марий парк" пӧртылеш!?

Вход на сайт

  • "Марий парк" гӱжлен (фото)
    • Марий Элын тӱрлӧ лукшо гыч 11 гармоньчо 19 июльышто «Чон ӱжеш Марий паркыш» каныме кас годым конкурсышто шке вийжым терген.

      IMG_0826-.jpg

      Йошкар-Оласе Чарла кремльыште эртыше «Чон ӱжеш Марий паркыш» каныме кас эркын-эркын йӱлашке пура. Теве ынде кокымшо гана эртыш. Тугеже кумшо, нылымше да эше шуко-шуко гана садак лиеш. Лишыл жапымак налаш: 15 августышто 18 шагатлан организатор - «МАРИКИНО» студий - угыч марий сем почеш муралташ да кушталташ пагален ӱжеш.

      Чынже денак, тиде пайрем марий-влакым пырля чумыра, илышлан куанаш тарата. Эше мо оҥайже: кажне кас икте-весыж деч ойыртемалтеш, вес семын ойлаш гын, кажне касын шке сынже уло, посна темылан пӧлеклалтеш! Июньышто чумыргымо годым кеҥеж да ты пагыт дене кылдалтше марий йӱла, эртарыме марий мероприятий-влак нерген ойленыт.

      IMG_0829-.jpg

      А шукерте огыл гармоньчо-влакын конкурсышт эртыш. Провой кундем гыч "Чату" ансамбль да Александр Семёнов, Йошкар-Ола гыч Александр Степанов, Сергей Царегородцев, Родион ден Иван Алексеевмыт, Медведево вел гыч Василий Орехов, Морко район Осипсола гыч Андрей Дмитриев, Морко кундем гычак Константин Иванов, Параньга район Ондропсола гыч Эрик ден Игорь Смирновмыт – лач нуно шке мастарлыкышт дене калыкым куандареныт.

      IMG_0831-.jpg

      Официальный да чумыргышо-влак кокла гыч ойырымо эрыкан жюрин аклымыж почеш, 1-ше верыш ачаж ден эргыже – Эрик ден Игорь Смирновмыт – лектыныт. Кокымшо вер дене «Чату» ансамбль палемдалтын гын, кумшо дене – Андрей Дмитриев. Нунын коклаште «Идеальная кровля» фирме деч 10 тӱжем теҥге модылтын (1-ше вер – 5 тӱжем теҥге, 2-шо – 3 тӱжем, 3-шо – 2 тӱжем). Моло-влакат пӧлек деч посна кодын огытыл. «МАРИКИНО» студий «Изуремыште кугу сӱан» DVD-дискым да чылаштланат студий лӱм дене Чап Кагазым кучыктен.

      IMG_0846-.jpg

      Каласыман: кажне ганак такмакым палыше-влакым пӧлек дене палемдат. Тиде умбакыжат лиеш! Но эше 15 августышто мастер-класс эрта. Тунам Эстоний гыч уна-влакым вучат.

      Эстонийысе Хааки ола гыч Куштымашым да музыкым йӧратыше обществыш ушнышо 21 еҥ (делегацийым марий пӧръеҥ Алексей Алексеев вуйлата) ик арнялан Оршанке районыш толеш, Козьмодемьянск олашкат миен савырна. А Йошкар-Оласе Чарла кремльыште нуно эстонла кушташ туныкташ тӱҥалыт гын, «Марий Эл» ансамбльын ончычсо куштызыжо Альберт Светлаков марла чын кушташ туныкта.

      Эн сайын куштышо-влакым адак пӧлек-шамыч вучат!!!

      Касым сӧрастарат: Александр Веткин, Зинаида Долгова, Светлана Осипова да молат. А гармонь дене Эрик ден Игорь Смирновмыт (гармоньчо-влакын конкурсыштышт сеҥыше улыт!!!) шокташ тӱҥалыт.

      Мутат уке, марий чон Марий паркышкак ӱжеш. Тек тушто таче Чарла кремль верланен, но кодшо курымын 70-ше ийлаштыже шочыктымо йӱлам пӧртылтыманак! Тыге шонат организатор-шамыч да тушко коштшо еҥ-влакат. Ӱмырда кужу да пиалан лийже, сай шонымашда илышышке шыҥдаралт шогыжо!

      Автор: Эльвира Куклина.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.