Эстоний гыч уна-влакым вучена
Вход на сайт
Тора да лишыл Эстон элын Хааня волость гыч 12 августышто Марий кундемыш уна-влак толшаш улыт.
15 еҥан делегаций ик арнялан Оршанке кундемыш вашмутан манме визитым ышта. Тений Марий талешке кечылан ты районысо Нужавлак кундемын «Кӱдыроҥгыр» коллективше (10 еҥ) Эстон мландыште – Татру, Таллин, Выру, Хаани олалаште - уна лийын. Ынде Оршанке районысо тӱвыра пӧлка вашлийыт Эстоний гыч Куштымашым да музыкым йӧратыше обществын (чынже дене - Хааня волость гыч куштымаш, модыш да муро общество) еҥже-влакым. Тиде тӱшкашке пурышо кажне еҥ тӱрлӧ аланыште пашам ышташ, но нуным икте ваш ыштен – сылне сем.
Делегацийым вуйлата марий пӧръеҥ, Йошкар-Олан шочшыжо да ятыр ий Эстонийыште илыше марий чонан, марий калык нерген икмыняр фильмым войзышо еҥ - Алексей Алексеев.
Тора кундем гыч толшо уна-влак Козьмодемьянск олашкат миен толшаш улыт. А 15 августышто Йошкар-Олашке Чарла кремльыште лийыт. Лӱмынак «Чон ӱжеш Марий паркыш» каныме касыш толыт. Тунам мастер-класс лиеш: эстон-влак шке куштымашыштлан туныктен ончат гын, марий-влак марла кушташ туныкташ тӱҥалыт.
Вучена уна-влакым!!!
