Самырыктукым ончыкылык верч!

Вход на сайт

Марий Элын самырыктукым виктемже Республикысе молодёжь форумлан ямдылалтеш. «Марий Элын ончыкылыкшо – самырыктукым кидыште. Ме ончыкылыкым ойырена!» лӱман кугу вашлиймаш 2015 ий 5 сентябрьыште Йошкар-Олаште лиеш. Тудо тÿрлö усталык площадке, пленар погынымаш да пресс-конференций гыч шога. Форум кышкарыштак Юл кундемысе федерал округын самырыктукым виктемыштым вуйлатыше-влакын семинар-погынымашышт эрта.

orgkomitet.jpg

Форумым ямдылыше да эртарыше комитет 20 августышто чумыргыш. Пашашке Марий Эл Республикысе виктемым вуйлатышын алмаштышыже, оргкомитет вуйлатыше Владимир Шишкин, тÿрлö министерстве гыч пашаеҥ-влак да молодёжь министр-шамыч ушнышт.

Погынымашым Марий Элын самырыктукым виктемжым вуйлатыше Василиса Баскакова вӱдыш. Тудо форумлан ямдылалтме нерген кумдан каласкалыш. Мутланымашке молодёжь министр-влак ушнышт. Вет нуно форумлан усталык площадке-влакым ямдылат.

Чылаже индеш площадке пашам ышташ тÿҥалеш:
1. «Время жить в Марий Эл» (Марий Элысе молодёжь парламентын);
2. «Народов много – дружба одна» (Марий Элысе калык-влакын молодёжь ассамблейыштын);
3. «Молодёжь за будущее Республики Марий Эл» (студент-шамычын);
4. «Мы строим будущее» (пашаче молодёжьын);
5. «Средства массовой информации Республики Марий Эл в реализации молодёжной политики в республике» (тÿшка-увер йöн-влакын);
6. «Счастливая семья – будущее родной республики!» (школ деч ончычсо туныктымо организацийлаште тыршыше-влакын);
7. «Спорт – ты жизнь» (самырык спортсмен-влакын);
8. «Здоровье - наше будущее» (самырык эмлызе ден медшÿжар-влакын).

А индешымше «И словом, и делом» лÿман площадке 4 сентябрьыште лиеш. Тудо – Марий Элын самырыктукым витемжын. Тиде кечынак Юл кундемысе самырыктукым виктем-влакын семинар-погынамашышт эрта. ПФО ден РФ молодёжь виктемын ончылъеҥже-влак регион-влак коклаште кылым ыштыме нерген ойлат, паша лектышыштым иктешлат, 2015-2016 ийлан паша радамым пеҥгыдемдат.

Тÿрыс форумыш кугу уна-влакым ÿжмö. Тушко Марий Элысе район ден олала гыч самырыктукым ушна.

Форумым «Марий Элын самырыктукым виктемже» совет эртара. Тудлан республикысе чыла гаяк министерстве, Кугыжаныш Погын, Йошкар-Оласе администраций, «Марий Эл» ГТРК да молат полшат.

Каласыман, «Марий Элын самырыктукым виктемже» совет кок ий ондак шочын. Кок ияш пашам иктешлымеке, тудо Россий кÿкшытыштö моло самырыктукым виктем коклаште 11-ше верыш логалын, а Юл кундемысе федерал округышто икымше верыш лектын. Марий Элын самырыктукым виктемжым таче Василиса Баскакова вуйлата, тудын алмаштышыже – Сергей Анисов. Тыгак виктемышке 15 молодёжь министр пура. Кугурак кокла гыч ты пашам виктарыше, самырыктукымлан сай йолташ - Владимир Викторович Шишкин, Марий Эл Республикысе виктемым вуйлатышын алмаштышыже, тазалык аралымаш министр.

Автор: Эльвира Куклина,
кыл да тÿшка коммуникаций молодёжь министр.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.