Икымше мелна когарген!? А тиде икымше мелна!?

Вход на сайт

Марий парк... Тиде кок мутышко шуко еҥын ятыр шарнымашыже шыҥен. Вет эше 1979 ийыштак Йошкар-Олан тиде верыштыже марий сем йоҥген, ӱдыр-каче-влак чон канен муреныт, куштеныт, шӱм пелашыштым вашлийыныт. А кузе чыла тӱҥалын? Тидын нерген 21 июньышто "Чон ӱжеш Марий паркыш" каныме касыш толшо Маргарита Моисеева (кызыт - Логинова, Йошкар-Оласе ик йочасадыште тырша) каласкалыш. Лач тудым ожно, Марий парк директор манын, порын ойленыт.

IMG_0231--.jpg

Маргарита Логинован ойлымыж гыч теве мо рашеме: Марий паркыш ӱдыр-рвезе-влак эреак чумыргаш йӧратеныт. Ик гана самырык Рита пырляшке ушнен. Тунам лачак марий сем йоҥген. Ӱдыр чытен огыл, "а молан шып шинчеда" манын, кушташ лектын, почешыже моло чолгаракшат ушнен.

Тиддеч вара кажне кастене гаяк Марий паркыште изин-кугун Маргарита Моисеевам вученыт. Туддеч посна кушташ лекташ ӧрыныт, кеч кумылышт моткоч шупшын. А Рита йолташыж-влаклан ойлен: "Мурен-куштымо деч огыл, аракам йӱмӧ, ораде койышым ончыктымо деч вожылман".

IMG_0193--.jpg

Чынак, Марий парк ятыр жап калык чоным куандарен; шошо шумеке, тудо почылтын да...

Чаманаш логалеш, таче тиде верыште Марий парк уке. Тудын олмеш Чарла кремльым чоҥен шындыме. Ты чоҥымашым тӱрлӧ еҥ тӱрлӧ семын акла. Но икте раш: кеч-могай ситуацийыштат нигунамат эртышым мӧҥгеш от пӧртылте. Чаманен да ала-кӧм вурсен илаш лиеш. Но, шоналтыза, тыште могай адак пайдаже? Вет ме кызытсе пагытын шочшыжо улына, сандене ӧкынен, вуйым шийын шинчаш намыс гай чучеш. Да тидлан шергакан жапымат йомдарыме ок шу, кунам паша, шонымаш моткоч шуко!

IMG_0199.jpg

Тыгак шонат "МАРИКИНО" студийыште тыршыше-влакат. Кузе палемдышна, ты студий ден Чарла кремль кодшо кугарнян "Чон ӱжеш Марий паркыш" каныме касым эртарышт. Тунам мурызо, гармоньчо, ансамбль-влак выступатлышт. А ончаш толшо-влак марий сем почеш кушталтышт да, тӱрлӧ викториныште шке вийыштым терген, пӧлек-шамыч дене палемдалтыч.

Тыгай каныме касым умбакыжат эртараш шонымаш уло. Иктым палыме шуэш: кузе шонеда, тыгай кас марий калыклан кӱлеш?

А "МАРИКИНОшто" паша шолеш. Тушто - тургым пагыт. Теве 23 июньышто Кужэҥер район Йывансола ялыште "Ял ӱмбалне мужыр йӱксӧ" у марий кинон икымше съёмкыже эртыш - куштымаш-влакым войзышт...

Тыште эше фото - http://mari-arslan.ru/mari/node/179

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.