14 июнь - Тӱнямбал блоггер кече. Тудым 2004 ий годсек палемдат. Марий блоггер кокла гыч ик эн ончыч Эльвира Куклинан блогшо (персональныйм сайтым ончаш огыл гын) - http://elvira_kuklina.livejournal.com - шочын. Кызыт тиде блог «Арслан» этнокультурный интернет-журнал (http://mari-arslan.ru) марте кушкын шуын.

У курым илышым куштылемдыше да оҥайым ыштыше у йӧн-влаклан поян. Иктыже – тиде Интернет. Тудын нерген тӱрлӧ шонымаш уло, но сай могыржо нерген мондыман огыл да кӱлеш семын жапыштыже тудын дене пайдаланен моштыман – илыш деч вараш кодаш огыл манын.
Чынже дене Интернетын йӧнжӧ моткоч кумда. Теве кеч-могай еҥ тушто шке блогшым ыштен кертеш. Мо тыгай блог? Тиде – тӱрлӧ сынан увер дене эреак пойдаралтше посна странице але эше онлайн-дневник маныт. Тыглай дневник деч ик эн тӱҥ ойыртемже – чыла возымым моло-влак лудын да тушан шке комментарийыштым коден кертыт.

1997 ийыште американ программист Йорн Баргер «weblog» терминым шонен луктын. Тудо интернет-дневникым тыге кӱчыкын лӱмдаш темлен. Ты терминым англичан йылме гыч кусараш гын, «эҥыремышвотышто событий-влакым возымаш» лиеш. Илен-толын, мут кок буквалан кӱчыкемын. Интернет дене кылдалтше вес еҥ – Питер Мерхольц – тиде шомакым кок ужашлан шелын: «We blog» - «Ме блогым ыштена». Тиддеч вара интернет-дневникым блог манаш тӱҥалыныт.

Блог айдемын шке илышыже да иктаж-могай посна теме дене кылдалт кертеш. Тудым таче кажне кумылан еҥлан вӱдаш йӧн уло. Тидлан Интернетыште яра кучылталтше платформо-влак улыт: тӱнямбал кӱкшытан - blogger.com, wordpress.com, livejournal.com; руш - wow.ya.ru, Diary.ru, blogs.mail.ru, LiveInternet.ru да молат.

Молан кӱлеш блог? Шкем ончыкташ, шке шонымашетым луктын каласаш, у да оҥай еҥ-влак дене палыме лияш, каналташ, оксам ыштен налаш, тунемаш.

Таче тыгай профессият уло – блоггер.

А марий тӱняште ик эн ончыч Эльвира Куклинан блогшо (персональныйм сайтым ончаш огыл гын) - http://elvira_kuklina.livejournal.com - шочын. Тудым журналист 2011 ий мучаште ыштен да девиз шотеш Альберт Степановын мутшым налын: «Шӱм семын илыме шуэш».

Тиде блог кок йылме дене – марла да рушла – возалтеш. Марий калык, тудын тӱвыраже, сай йӱлаж нерген каласкала. Тӱрлӧ фотолан, видеолан поян. Автор тургыжланыше йодыш-влакымат тарвата, кудыжлан вашмутым лудшо-влакат кычалаш полшат – шке комментарийыштым кодыт.

Эльвира Куклинан блогшо республике кӱкшытыштӧ эртыше «Марнетын шӱдыржӧ» конкурсышто «Эн сай блог» семын палемдалтын. Тыгак «Ростелеком» компанийын эртырыме Регион-влак кокласе «ЖЖ-изнь – это общение» конкурсыштыжо «Верность традициям» номинацийыште сеҥен.

Тиде блог «Арслан» этнокультурный интернет-журнал (http://mari-arslan.ru) марте кушкын шуын. Чын, блогшат уло, да ынде эше марий калык нерген кок йылме дене интернет-журнал лектын шога. Тиде – Эльвира Куклинан у проектше. Ты проект Марий Элысе тӱвыра, печать да калык-влак паша шотышто министерствын «Этнокультурное развитие Марий Эл (2009-2013)» республикысе программыж почеш илышыш шыҥдаралтеш.

Йылмым, тӱвырам, йӱлам арален кодымаште Интернет – йӧршын у йӧн, но тудын пайдалыман, вет тыге ме тӱрлӧ вере шаланен пытыше шочмо калыкна дене кылым ыштен, самырыктукымым шке йылмыжым палаш, калыкшым пагалаш туныктен кертына.

Автор: Лемде ӱдыр.