Марий самырыктукымын Россий кӱкшытан IV слётыштыжо лийше-влак Евгений Викторович Небогатиковым шарнеда? Тудым лӱмгечыж дене саламлена!

Вход на сайт

Nebogatikov_Arslan_0.jpg2015 ий 31 январьыште чолга марий еҥ Евгений Викторович Небогатиков 50 ияш лӱмгечыжым палемдыш. Тудым Марий Оньыжа да Мер Каҥаш ден Марий калык конгрессын еҥже-влак саламлышт. Анатолий Иванов Марий Эл Кугыжаныш Погынын Чап Кагазшым кучыктыш.

Евгений Викторович Небогатиков 1965 ийыште У Торъял район Шемермучаште шочын-кушкын. Н.Крупская лӱмеш Марий кугыжаныш пединститутышто (1989 ий, технологий туныктышо), Марий кугыжаныш университетыште (1998 ий, биологий да химий туныктышо) тунемын. 1989-1995 ийлаште У Торъял район Нурма школышто технологийым туныктен, 1995-1998 ийлаште ОБЖ-ым вӱден, директорын воспитательный паша шотышто алмаштыже лийын. 1999-2014 ийлаште Токтарсола школын директоржылан тыршен. 2014 ий октябрь гыч - У Торъял районым вуйлатыше, депутат-влак Погынын председательже.

Тудо мер пашаштат моткоч чолга: Токтарсолан старостыже, ял шотан илемын депутатше, Тошто Торъял ял шотан илемын депутатше (кок гана), Тошто Торъял ял шотан илемым вуйлатыше лийын. Кызыт районысо "Мер Каҥаш" активым, Марий калык конгрессым, "Единая Россия" партийын район политсоветшым вуйлата.

"Токтар-Онар" проектын авторже. Тыге таче Токтарсола школ Онарын лӱмжым нумалеш, ялыш пурымаште тиде талешкылан стелым шогалтыме. Ялысе "Онар пӱям" уэмдыме. Ял пайремымат, Пеледыш пайремымат эртараш таратен. Жапше годым шкежак Марий самырыктукымын Россий кӱкшытан IV слётшым Токтарсола школ пелен эртараш темлен. Кызытат ӱдыр-рвезе-влак куанен шарнат школ ончылно сӧрастарыме фонтаным, "Вий" памашым.

Евгений Викторович, умбакыжат пашада воранен шогыжо, пиалым, пеҥгыде тазалыкым, кужу-кужу ӱмырым тыланена.

Автор: Эльвира Куклина.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.