Кугунур кундемын «мурчондайже»

Вход на сайт

nasi.png14 октябрьыште, Покро кечын, Республикысе марий тӱвыра рӱдерын пашаеҥже-влак тошто пайрем мурым погымо амал дене Оршанге район Кугунур селашке миеныт.

Уна-влакым верысе тӱвыра пӧрт пеленсе «Какшан сем» ансамбльын участникше Лидия Валентиновна Бердникова шке суртыштыжо вашлийын. Тудын аваже Анастасия Николаевна Бердникова - Начи кока - шуко тошто мурын шомакшым пала, а семжыми шке жапыштыже Лида ӱдыржӧ шарнен кодын. Сандене тиде ешын «мурчондайыштыже» Кугу сар деч ончысо да варасе мур-влак аралалтыт. Начи кокай ача-аважын сӱан, унам вашлийме, койдарыме, каласыме муро-влакшым шарна.

Вашлиймаште Клавдиян, Лаймырын, Топтыгин Николайын, Марпа кокан, Кома Раян, Феликс Майоровын мурышт йонгышт. Мурызо-влак илыш дене чеверласеныт гынат, мурен кодымышт калык чонышто ила.

Orshanke1_0.png

Вашлиймаш годым Лидия Валентиновналан Лидия Николаевна Кудрявцева, Зинаида Павловна Волкова, Наталья Геннадьевна Богданова мураш полшышт.

Тыге шымлыме паша Кугунур кундемыште тӱҥале. Шыже пайрем радамыште мондалтше «Ӱдырсий» эн весела лийын. Тудо моло район деч ойыртемалтеш - Оршанге кундемыште Шорыкйол годым огыл, Покро арняште эртаралтын. Пайрем озаватын да ӱдыр-влакын кужумурышт дене тӱҥалын. Кызыт тиде семат мондалт толеш. Кугунур кундемыште тӱҥ пайремлан Крешын ден «Пӧтренгече» (Петро) шотлалтын. Унам вашлийме да ужатыме муро «лӱҥген-лӱҥген» муралтын. Йыр куштымаш изиш варарак илышыш пурен. Петро кечынак шудым солен толшо-влакын шкешотан семышт йоҥген. Чыла тидым уэмден, тукым гыч тукымыш кусарен толаш кӱлеш.

Автор: Галина Петухова.
Республикысе марий тӱвыра рӱдерын сайтше - http://chm.mari-centr.ru.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.